Qarşınızda olan bu kiçikhəcmli kitab fitrə zəkatının hökmləri barədədir. Bəzən şəri risalələrdə qeyd olunan məsələlərin çətin başa düşülən olduğunu, eləcə də bəzi hallarda oxucuların fətvaların dəlilləri ilə icmali də olsa, maraqlandığını nəzərə alaraq bu kitabı tərtib etməyi qərara aldıq. Belə ki, kitabda bir çox məsələləri daha geniş, daha aydın şəkildə və dəlilləri ilə birlikdə tərtib etmişik. Lakin qeyd etmək lazımdır ki, məsələlərin dəlilləri təfsilati şəkildə yox, sadəcə icmali formada qeyd edilmişdir. Dəlilləri təfsilati olaraq qeyd etməməyimizə səbəb həm kitabın nəzərdə tutulmuş həcmi, həm də geniş oxucu kütləsinə vermək istədiyimiz fayda ilə ziddiyyət təşkil etməsidir. Çünki bu zaman həm kitabın həcmi həddindən artıq geniş, həm də məsələlərin başa düşülməsi əksər oxucular üçün çox çətin olacaqdı.
